बलिउड अभिनेता सलमान खानको फिल्म 'मातृभूमि: मे वार रेस्ट इन पिस'को ट्रेलर सार्वजनिक भएको छ।
मंगलबार राति सार्वजनिक ट्रेलरमा नेपाली अभिनेता अनुपविक्रम शाहीले पनि उल्लेखनीय स्थान पाएका छन्। ट्रेलरमा उनी सलमान खानसँगै आमनेसामने देखिन्छन्।
फिल्ममा अनुपविक्रम चिनियाँ सेनाका मेजरको भूमिकामा देखिएका छन्। ट्रेलरमा उनलाई सलमान खानसँग भिडन्तमा उत्रिएको देख्न सकिन्छ। सलमान भारतीय सेनाको नेतृत्व गरिरहेको देख्न सकिन्छ।
विशेषगरी सलमानसँग आमनेसामने दृश्य, उनीसँगको भिडन्त, प्रशस्त संवाद तथा द्वन्द्वका दृश्यले फिल्ममा अनुपको भूमिका विशेष रहेको देखिन्छ।
ट्रेलरमा स्वर्गीय अभिनेता तथा गायक प्रशान्त तामाङलाई पनि देख्न सकिन्छ। उनको भूमिका पनि सामान्य उपस्थितिमा मात्र सीमित नरहेको देखिन्छ। प्रशान्तको यो फिल्मको छायांकनका क्रममा नै निधन भएको थियो। उनको निधनपछि फिल्ममा उनले निर्वाह गरेको भूमिकाका दृश्यलाई कसरी समेटिएको छ भन्ने विषयमा पनि दर्शकको चासो देखिन्छ।
सलमान खान फिल्मस्को प्रस्तुति रहेको 'मातृभूमि' अपूर्व लाखियाले निर्देशन गरेका हुन्। फिल्ममा अभिनेत्री चित्रांगदा सिंह सलमानको पत्नीको भूमिकामा देखिएकी छन्।
यो फिल्म सन् २०२० मा भारत-चीनबीच गलवान उपत्यकामा भएको सैन्य झडपको पृष्ठभूमिमा बनेको हो। फिल्मले सीमामा तैनाथ सैनिकको वीरता, बलिदान, पारिवारिक पीडा र अन्ततः युद्धभन्दा शान्ति ठूलो हुने सन्देश दिने निर्माणपक्षले जनाएको छ।
फिल्मको नाम यसअघि 'ब्याटल अफ गलवान' राखिएको थियो। पछि परिवर्तन गरेर 'मातृभूमि: मे वार रेस्ट इन पिस' बनाइएको हो। फिल्म आगामी डिसेम्बर ४ (मंसिर १८)देखि प्रदर्शन हुने तय छ।
